Yanditswe na Nema Ange
Inkuru dukesha ikinyamakuru Igihe.com iratangaza ko abatwara abagenzi muri taxi batangiye guhagarikwa ku kazi kubera kubura amafaranga yo kwishyura imisoro mu bihe bya Covid-19. Aho basabye ubuyobozi kubafasha bukabatera utwatsi ngo “ngo utayabona ntazagaruke aha”.
Abatwara abagenzi bo mu karere ka Musanze batangiye guhura n’imbogamizi zituruka k’ubutegetsi, aho bamwe muri bo babujijwe gukora umwuga kubera batatanze amafaranga ibihumbi ijana 100 000 Frw y’umusoro kandi basobanura ko muri ibi bihe nayo binjiza. Bahati Claude, umwe muri bo yatangarije umunyamakuru w’Igihe ko “Twabyutse tuje mu kazi nk’uko bisanzwe batubwira ko tutemerewe gukora tutishyuye ibihumbi 100 Frw dusanzwe dutanga ku kwezi, kandi mu by’ukuri ntari kuboneka kuko abagenzi baragabanutse”, yongeraho ko kubura abagenzi bituruka ku ngamba ubuyobozi bwafashe mu gukumira ikwirakwizwa rya CoronaVirus : “Twemerewe gutwara abagenzi umunani twatwaraga 18, n’aba umunani hari ubwo utababona. Niba ku munsi nkoreye ibihumbi bitandatu, ndibutange bitatu bya parikingi, ntacyo nsagura. Twabasabye ngo batugabanyirize baraatubwira ngo utayabona ntazagaruke aha.”
Leta ya FPR ikomeje guhabwa inguzanyo mu mahanga mu izina ry’Abanyarwanda, hakaniyongeraho imfashanyo igenewe gufasha abahuye n’ingaruza z’icyorezo covid-19, umuntu yakwibaza aho ayo mafaranga ajya? Ubusanzwe abatwara abagenzi : « basora ibihumbi 150 buri kwezi, n’ibihumbi bitatu bya buri munsi batangaga bishyura muri gare bakoreramo, gusa aho iki icyorezo kiziye umusoro waragabanyijwe ugera ku bihumbi 100 ku kwezi. ».
Mu bindi bihugu abayobozi barakora uko bashoboye ngo bafashe Abaturage n’Ibigo byaba ibya Leta n’ibyigenga, kubera ari bwo buryo bwonyine bwo kugabanya ingaruruka z’icyorezo Covid-19 k’ubukungu bw’igihugu. Leta ya FPR yo irakomeza gukora ibintu mu buryo bucuritse. Urugero twatanga n’igihugu cya Benin, aho guverinoma yasohoye miliyari 74 y’amafaranga ya CFA (ajya kungana na miliyoni y’amadorali 128 ) mu rwego rwo kurinda abaturage, ubucuruzi, abakozi n’abanyabukorikori. Minisitiri w’imari yatangaje ko ayo mafaranga “atavuye mu ijuru”, ni amafaranga yavuye “isanduku ya Leta”. Mu Rwanda iyo sanduku imenya gusa abagize agatsiko ka FPR.
Nema Ange