Yanditswe n’Uwamwezi Cecile
Ejo ku wa kane ku i tariki ya 10 Nzeri 2020, umuryango uharanira uburenngazira bwa kiremwa muntu, Human Rights Watch (HRW) watangaje ko u Rwanda rugomba gutanga raporo ivuga aho Paul Rusesabagina yari kuva yagera I Kigali kuwa kane tariki ya 27 kanama 2020 kugera kuwa mbere tariki ya 31 kanama 2020. Uwo muryango wagize uti “Iyo ubuyobozi bwambuye umuntu ubwisanzure, ntibutangaze ko bwamufashe, bugahisha ko bwamufunze ku gahato, ni icyaha bita “kunyuruzwa ku ngufu” icyo cyaha ntikemewe n’amategeko mpuzamahanga. Abantu bafite uruhare mu bikorwa nk’ibi bagomba kubiryozwa”.
Ibyo bisohotse nyuma yuko ikinyoma cya RIB ya Kagame yatangaje ko biturutse ku bufatanye n’amahanga RIB yafashe Paul Rusesabagina cyakubitiwe ahakubuye n’ahakoropye n’amahanga yahise ahakana yivuye inyuma kuba yaragize uruhare muri icyo cyaha cyo gushimuta Paul Rusesabagina.
Hamaze kumenyakana ko Paul Rusesabagina yavuye I Dubai ajya I Kigali mu ndege ya Bombardier Challenger 605 y’isosiyete ya Gainjet – ifite ibiro i Kigali kandi ikoreshwa buri gihe n’abayobozi b’u Rwanda, cyane cyane na Kagame n’umuryango we.
HRW yavuze ko “nyuma y’iminsi irenga 10 u Rwanda rwemeye ko Rusesabagina yatawe muri yombi, abategetsi b’u Rwanda ntibaratanga amakuru ahamye cyangwa yuzuye y’ukuntu yafashwe nyuma akaza gufungwa. By’umwihariko, abategetsi b’u Rwanda ntibaravuga uwamufashe n’uwari umufite mu maboko ye kuva yava i Dubai ku ya 27 Kanama kugeza igihe bamwerekaniye i Kigali ku ya 31 Kanama 2020”.
K’uruhande rw’umuryango we, uratangaza ko ufite ubwoba ko Rusesabagina adashobora kuvuga mu bwisanzure kubera ko abanyamategeko babiri, reka aha tubibutse ko yabahitiwemo na Leta y’agatsiko, batari mu itsinda ry’abanyamategeko umuryango wahisemo bari bahari igihe bemerewe kuvugana nawe. Kandi ko bari banahari igihe uhagarariye ububiligi mu Rwanda yagiye gusura Rusesabagina. Turabibutsa ko Rusesabagina afite ubwenegihugu bw’ububiligi. Ikindi kitazwi ni ukumenya niba Rusesabagina yaragize uburenganzira bwo guhitamo umwunganira mu mategeko kubera ko abategetsi b’u Rwanda babwiye ibitangazamakuru ko banze umunyamategeko umuryango wa Rusesabagina wari wafashe. Umuryango wa Rusesabagina ufite impungenge ko mu Rwanda ahafatira imiti itandukanye niyo yari asanzwe afata kubera uburwayi afite.
Undi muryango uharanira uburenganzira bwa muntu “Global Campaing for Rwandan’s Human Rights” watangaje wo kuri uyu wa gatanu ko : “Dufite amakuru aturuka ku bantu twizeye mu Rwanda atubwira ko bwana Rusesabagina yakorewe iyicarubozo rikabije bigatuma yanga abanyamategeko ku rwego mpuzamahanga yari yahitiwemo n’umuryango we kugira ngo bamuburanire mu rukiko. Kubera iyicarubozo, Bwana Rusesabagina yemeye ubu umunyamategeko watowe na Leta nta burambe bw’umwuga afite bukenewe mu kuburana imanza zikomeye”.
Nanone kuri uyu munsi uwo mwunganizi wa Paul Rusesabagina “yatangaje ko yasabiye umukiliya we kuba yakurikiranwa adafunzwe kubera impamvu zirimo uburwayi amaranye igihe, ndetse no kuba ari “umuntu mwiza” utarahamwe n’icyaha na kimwe kandi wahawe n’ibihembo mpuzamahanga, bigaragaza ubunyangamugayo bwe”.
Turabibutsa ko umucamanza mukuru mu Rwanda ufite ubutabera bwe ejo bundi yaciye urubanza avuga ko ibiganza bya Paul Rusesabagina biriho amaraso y’Abanyarwanda. Ubundi mu Rwanda rwa Kagame iyo yaciye urubanza biba byarangiye. Reka tubitege amaso
Uwamwezi Cecile