Muri Leta zunze Ubumwe za Amerika abanduye Coronavirus bagera muri 226,000. Ikaba yahitanye abarenga ibihumbi 5,000! Mu Rwanda abantu 82 nibo gusa bayanduye. Kuki Anyarwanda aribo bagirihwe impuhwe bahinduka imbeba (cobayes) mu kugerageza inkingo za covid-19? Ijisho ry’Abaryankuna ryasesenguye.
Mu nama y’ishyaka rya FPR Inkotanyi yabereye i Kigali mu mpera za 2017 niho Abanyarwanda bumvise Paul Kagame asaba Dr Clet Niyikiza gukora ubushakashatsi ku gikeri. Ngo kubera ko iyo ugiteye hejuru aho kigwa hose kigwa kikureba! Icyo gihe ababyumvaga kuri Radio n’ababirebaga kuri Televisiyo barababwe. Bibaza akazava mu gikeri barashoberwa. Abari mu nteko bo kubera ubwoba bakomye mu mashyi! Nyamara abazi Paul Kagame bavuga neza ko adapfa kuvuga ikintu ubusa gusa. Muribuka avuga ibyo kwicisha isazi inyundo, cyangwa kurasa abantu ku manywa y’ihangu, cyangwa ngo nakwica. Nyuma y’aho abivugiye amaze kwirenza abatari bake.
Dr Clet Niyikiza ni muntu ki?
Nk’uko yabitangarije ikinyamakuru cya Kigali The New Times, Dr Clet Niyikiza ngo yavukiye mu Karere ka Kamonyi mu mwaka wa 1958. Nyuma muri 1983 yaje kwerekeza muri Leta Zunze Ubumwe za Amerika aho yakomereje amashuri ye ahavana impamyabushobozi y’ikirenga mu mibare ayikuye muri University ya Indiana. Mu mwaka wa 2008, Paul Kagame yamushyize mu kanama ngishwanama ke maze aramwiyegereza bikomeye. Ni muri ubwo bwiru bw’imishinga Paul Kagame akorera muri Leta Zunze Ubumwe za Amerika, Dr Clet Niyikiza yahawe akayabo ka Miliyoni 22 z’amadolari zivuye mu mitsi y’abanyarwanda ngo ayashore ikigo gishinzwe ubushakashatsi ku cyitwa Merrimacks Pharamaceuticakls afatanyije na Kagame. Dr Niyikiza akimara gushora ako kayabo muri icyo kigo yahise akibera umuyobozi wungirije. Ariko nyuma abantu ntibasobanukiwe n’uburyo yavuyemo ahubwo agashinga ikindi kigo kitwa LEAF PHARMACEUTICALS. Ubu twandika iyi nkuru, ku rubuga rw’ikigo MERRIMACKS PHARMACEUTICALS handitse ko kiri kugurishwa. Nta muntu n’umwe uzi irengero ry’umutungo w’abanyarwanda ubarirwa muri Miliyoni 22 z’amadolari zingana n’amafaranga y’u Rwanda arenga miliyari 20.
Ubushakashatsi ku gikeri yasabwe na Kagame bwatanze iki?
Icyo kibazo nta we ugifitiye igisubizo uretse Kagame na Niyikiza. Nta n’uwatinyuka kukibaza mu Rwanda. Gusa icyo tuzi cyo nuko Niyikiza adasiba mu rugwiro cyangwa se mu mafoto ari kumwe na Paul cyangwa Jeannette Kagame. Nk’uko twabivuze mu ntangiriro, abanyarwanda bumijwe no kumva ko icyari gihangayikishije Kagame na Niyikiza ari ubushakashatsi ku gikeri! Ese havuyemo iki muri ubwo bushakashatsi? Ese bwatwaye amafaranga angahe? Nta wamenya. Amabanga ari hagati y’abo bagabo agaragarira mu bintu biteye kwibaza. Ababikurukiranira hafi bemeza ko Dr Clet Niyikiza yari inyuma y’inkundura yamaze iminsi mu Rwanda yo gukingira abana Cancer y’inkondo y’umura. Ibiro bya Jeannette Kagame bikaba byarashyize imbaraga zidasanzwe muri iyo gahunda. Indi nkundura Dr Clet Niyikiza yari abereye rumashana ni iyo gushahura abagabo babafungira burundu kubyara. Nabyo mwarabyumvise Leta yarabigize nk’itegeko mu turere aho mu Karere ka Rulindo bageze aho n’aho bashinga amashyirahamwe yitwa ngo turuhure abagore bacu.
Ubu ikigezweho ni Coronavirus
Nyuma y’iyo mishinga idasobanutse, ubu Paul Kagame na Dr Clet Niyikiza bari kwitwikira icyorezo cya Coronavirus ngo bagire abanyarwanda imbeba (cobayes) zo kugeregerezwaho inkingo zikorerwa mu bigo bashinze muri Amerika. Ubu twandika iyi nkuru, Leta zunze Ubumwe za Amerika zimaze kugira abanduye Coronavirus bagera muri 226,000. Abarenga ibihumbi 5,000 bakaba bamazwe guhitwanwa n’icyo cyorezo.
Kuki Kagame na Niyikiza batagiye kugeragereza izo nkingo zabo muri Amerika aho icyo kigo cyabo gifite ikicaro ahubwo bagahitamo kuza kubigeragereza ku Banyarwanda bafite gusa abantu 82 banduye Coronavirus, hakaba nta n’umwe urahitanwa nayo ?
Impamvu nta yindi : Nuko imishinga ya Kagame na Niyikiza irimo akantu. Birasaba ko abanyarwanda bakanguka bakareka gukomezwa gucurwa bufuni na buhoro n’igitugu cya Paul Kagame wigize umwami utavugirwamo. Umwami ukenesha abe, agasenyera abe, yarangiza akabagira ibikoresho by’ubucuruzi n’imbeba zo kugeragerezwaho ubushakashatsi batazi icyo bugamije kandi bushobora kubagira ho ingaruka mu buzima bwabo busanzwe budahagaze neza kubera gukeneshwa no kuyobozwa inkoni y’icyuma.
Ikindi kitumvikana ni ukuntu umuntu wize imibare ari we ukora ubushakashatsi mu byerekeranye n’ubuganga!
Kayinamura Lambert