Yanditswe na Remezo Rodriguez
Nyuma y’igihe gito kitanageze ku masaha 48 umuhesha w’inkiko w’umwuga Me MUKANSONEYE Marie Vianney asohoye itangazo rya Cyamuna y’imitungo itimukanwa ya Bwana Alain Mukurarinda n’uwo bashakanye, Me Nzeyimana Boniface wunganira Mukurarinda kuri uyu wa 24 Kamena 2020 nawe yanditse ibaruwa ihagarikisha icyo cyamunara avuga ko abo ahagarariye mu mategeko bishyuye urubanza batsinzwe! Mukurarinda bivugwa ko yariganyije benshi yishyingikirije ko aziranye cyangwa ahagarariwe n’ingwe yitwa FPR, ashobora kuba agerwa amajanja!
Nkuko mubibona kuri uru rwandiko, Umunyamategeko Nzeyimana aratangazwa no kubona umunyamategeko mugenzi we yihutiye gusohora itangazo riteza cyamuna imitungo ya Alain Mukurarinda n’umugore we Gatabazi Umutoniwabo Martine ngo hishyurwe umwenda wa Famida Hashim kandi yaramaze kubona aye kera!
Ibi bishobora kuba bitapfuye kuba gutyo gusa, kuko ukurikije aho ikoranabuhanga rigeze, ikibaye kuri conti y’umuntu, ahita abona ubutumwa bugufi kuri telefone ye ngendanwa, cyangwa Bank ikaba yamwoherereza email bitewe n’uburyo nyirikonti yahisemo. Ntibyumvikana ukuntu Mukurarinda yarishye nyirikurihwa ntamenye ko yishyuwe kugeza ubwo Umuheshawinkiko ajya gutanga amatangazo akanayanyuza mu kinyamakuru kibogamiye kuri FPR, Igihe.com! Ibi ni bimwe Abanyarwanda bavuga ko birimo Tena!
Nkuko yabyanditse n’intoki by’inyongera kubyari byanditswe n’imashini, Me Nzeyimana wunganira umuryango wa Mukurarinda yarinze gusanga umunyamategeko mugenzi we mu nzira yemwe mu masaha y’akaruhuko ka saa sita amuha urwo rwandiko rusaba guhagarikisha iyo cyamunara asa nk’utanguranwa! Gusa niba Mukurarinda n’imitungo ye FPR na Kagame wayo bayitumye, buracya bahimbye andi mayeri! Keretse Mukurarinda abashishe kubikuta mu ivarisi akabyandurukana i Burayi!
Uyu muhanzi wanigeze no kuba umuvuguzi w’Ubushinjacyaha bwa Kagame, Alain Mukurarinda, agezwe amajanja mu gihe nawe yishinjikirije imikoranire n’ubutegetsi bwa FPR maze agacucura benshi ababeshya ko ari kubavuganira mu bucamanza bwo kwa Kagame avuga ko yigerera kwa Jonhson Busingye adakomanze!
Ijisho ry’Abaryankuna ririmo kubegereranyiriza amakuru yose y’ibyo Mukurarinda yakoze yishingikirije uko gukorana na FPR, tukaba tuzabibagezaho mu gihe kitarambiranye! Akebo kajya iwa Mugarura! Nikenshi dushishikariza Abanyarwanda kwirinda guhemukira bagenzi babo bibeshya ko bakorana na Kagame ariko ntibumve!
Remezo Rodriguez
Umujyi wa Kigali.