Yanditswe na Honoré Murenzi
Kuri uyu wa kabiri tariki ya 7 Mata 2020, umunyamakuru Anjan Sundaram, akoresheje urubuga nkoranyambaga rwa Twitter yatangaje ko muri iki cyumweru inshuti ye y’umunyarwanda yitabye Imana iri mu Rwanda izize COVID-19! Ariko ngo abayobozi b’u Rwanda bavuga ko yazize indwara y’umutima, nyamara ngo umuntu wageze ku murambo mbere yashyizwe mu kato k’iminsi 14! Anjan Sundaram agira ati: “Uku niko abategetsi b’igitugu bacunga imibare y’abahitanwa na Coronavirus”.
Bwana Sundaram yakomeje inkuru ye agira ati “Inshuti yanjye yarapimwe basanga yaranduye Coronavirus. Twaravuganye icyumweru mbere yuko apfa. Icyo giye yahumekaga nabi rimwe na rimwe n’injoro, ariko yari afite ikizere ko azakira”.
Niba koko iyi nshuti ya Anjan Sundaram yarahitanywe na COVID-19 bikagirwa ibanga, ibi byatuma abantu batangira gukeka ko imibare itangazwa n’uubutegetsi bw’u Rwanda yaba iy’abanduye COVID-19 cyangwa abo yahitanye ishobora kuba irimo itekinika.
Mu itangazo Ministeri y’ubuzima mu Rwanda yashyize ahagaragara kuri uyu wa kabiri tariki ya 7 Mata 2020, iravuga ko kuri uyu munsi nta murwayi mushya wagaragaye mu Rwanda ku bipimo 806 byafashwe, ni ukuvuga ko abanduye Coronavirus mu Rwanda batangazwa na Leta ari 105 (muri bo ngo 7 barakize) ngo nta n’umwe uritaba Imana.
Abatazi Anjan Sundaram, ni umunyamakuru w’icyamamare akaba n’umwanditsi ku rwego rw’isi.
Kugira ngo mwumve ubuhangage bwe n’agaciro ibyo yandika byagira, yabaye reporter ku mugabane wa Africa n’uburasirazuba bwo hagati w’ibinyamakuru New york Time na Associated Press.
Inyandiko yandika kuri Africa zagiye zisohoka muri Foreign Policy, Fortune, The Washington Post, the Los Angeles Times, The Chicago Tribune, the Guardian, the International Herald Tribune na Huffingston Post.
Yahawe ikiganiro na BBC na RFI cyavugaga ku mimirere yariho muri Africa. Muri 2006 yahawe igihembo kitwa Reuters journalism award ku nkuru yari yakoze yavugaga ku basangwabutaka baba mu Ishyamba ry’inzitane muri Congo.
Uyu mwanditsi yabaye mu Rwanda ku buryo ahazi neza yananditse igitabo ku Rwanda yise: Bad News: Last Journalists in a Dictatorship (mu cyongereza), Bad News – Derniers journalistes sous une dictature (mu gifaransa) bivuze mu Kinyarwanda “Inkuru mbi, abanyamakuru banyuma mu gihugu cyiyobowe n’igitugu”.
Nkuko ibisanzwe, mu gushyigikira ikinyoma cya FPR, Intore zatangiye kumwibasira kuri Twitter, aho yahise agira ati : “Abayobozi b’igitugu na #Covid : ntangaje urupfu rw’umuntu wazize Coronavirus. Ingabo z’intore zitangira kuntuka bashyigikira guverinoma. Aboyobozi batinya icyo cyorezo barerekana ubushobozi bwabo bwo kuyobora buke. Ubu kuvuga ku nshuti yishwe n’iki cyorezo bibaye igikorwa cyo kwitondera”.
Anjan Sundaram yunganiwe n’abantu benshi harimo Alex Gladstein, Chief Strategy Officer mu muryango uharanira uburenganzira bw’ikiremwa muntu, wagize ati “ Muzirikane ko abanyagitugu ku isi barimo barabeshya ku mibare yabo ya Covid-19 n’umubare wabo yahitanye. Kugira ngo berekane ko bazi gukora kandi ko bakomeye, kandi bazi ko OMS n’ubundi buyobozi batazashobora kugenzura imibare yabo, ko bazayemera uko bayitangaje”.
Honoré Murenzi