Kuwa 28 Mata 2021, Umukuru w’igihugu cya Mozambique Filipe Nyusi yagiriye urugendo rutanyuze Kagame kuburyo n’ibiro bye byashatse kuruhisha burundu bikananirana kuko ibyarwo byamenyekanye nyuma y’umunsi rubaye, bigatangazwa mu binyamakuru byegamiye kuri Leta mu Rwanda nyuma y’iminsi 2 yose nabwo ari uko bisakaye ku mbuga nkoranyambaga, nyuma y’aho Televiziyo ya Mozambique itangaje iby’urwo rugendo!
Kurundi ruhande Claude Nikobisanzwe ambasaderi wa Kagame i Maputo muri Mozambique wirukanywe muri Afrika y’epfo aho yakoraga muri ambasade y’u Rwanda nk’umunyamabanga wa mbere, akahava shishi itabona adakoza amaguru hasi kubera uruhare yagize mu bwicanyi bwahitanye uwigeze gukurira iperereza ry’u Rwanda Col Patrick Karegeya wishwe mu ijoro ry’uwa 31 Ukuboza 2013, nyuma akaza gushyekerwa akanagerageza kwicisha uwigeze gukurira ingabo z’u Rwanda Gen Kayumba Nyamwasa, bitewe n’uko amaraso y’abantu benshi Kagame n’agatsiko ke bamennye birengagije ko Mozambique ari nk’umwana w’Afurika y’Epfo maze begura Claude Nikobisanzwe uwo bamugi Ambasaderi i Maputo! Ni nko ku kwirukana mu Ruhango ukajya i Muhanga cyangwa St Paul ukajya St Famille! Kuri ubu yatangiye kujijisha abanyamozambique, yigira umwana mwiza nk’uko byagaragaye kuri imwe muri televiziyo zo muri iki gihugu.
Claude Nikobisanzwe, nk’uko bisanzwe ku bicanyi ba Kagame yiyemeje gukina umukino wo kububa yibagirwa ko abonwa n’abahagaze maze atangira kwigira inama zo kwiyamamaza ngo yigire intama kandi ari ikirura! Nguko uko yatunguranye yiha gutegura igikorwa cy’umuganda ngo arakora isuku mu mujyi wa Maputo! Ku batabizi Maputo (Intara ya Maputo+umujyi wayo) iruta u Rwanda rwose Kuko mu gihe u Rwanda rufite ubuso bungana na km2 26,338 Maputo yo ubuso bwayo ni 26,358 km2 ! Umuntu agira atya ati ngiye kuwukoramo isuku!
Mbere gato yari yabanje kuzenguruka mu nzego zitandukanye z’ubuyobozi bwa Mozambique harimo iz’igipolisi, ubushinjacyaha no mu butegetsi bwite bwa Leta, hose agenda atanga amafaranga ndetse asezeranya no gutanga andi akayabo igihe icyo asaba yagihabwa: Imitwe nibura itatu y’abacuruzi bakomeye b’abanyarwanda muri Mozambique we yita interahamwe. Ambasaderi yashoyemo ruswa itagira ingano ariko birangira akubise igihwereye, kuko nawe ubwe ariwe ubanza kuri urwo rutonde rw’abicanyi kandi Mozambique ikaba izi neza icyo abo bacuruzi bamariye icyo gihugu mu kuzamura ubukungu!
Muri uku kwezi kwa 04/2021 uyu Ambasaderi yagiye kuri imwe muri Televiziyo za Mozambique maze atangaza ko ambasade idatoranya abanyarwanda ko nta n’umwe ifata nk’impunzi ko bose ibaha ubufasha! Abumvise ibyo bose bifashe ku munwa! Uyu mu ambasaderi nta ibiro atagezemo yikoreye amadosiye avuga ko ari ay’interahamwe! None mu rwego rwo kwinjira mu ruhu rw’intama, yumvikanye agira ati
“Abo ahari bahunze u Rwanda mu gihe cya jenoside kubera ubwoba… ariko ubu sinkeka ko icyo batinya ari uko jenoside yakongera kubaho, ahubwo bashobora kuba batinya kuko bamaze igihe kirekire batagera mu Rwanda ku buryo batazi ko u Rwanda rwahindutse”!
Nk’uko mubyumva mu mvugo ye yuzuye uburyarya, aragerageza guhuma amaso abanyamozambike asa nk’ubereka ko icyo bahunze cyarangiye kera abantu bakaba bari mu buhungiro kubera kutagira amakuru gusa! Ibi birasa nk’aho yiregagiza ko isi yabaye nk’umudugu ko ibyo bakorera abanyarwanda bizenguruka isi uwabikoze atarava n’aho yabikoreye!
Mugihe Mozambique iri mu bihugu bigendera ku mategeko kuburyo bukomeye, inzego zose n’ubucamanza bikaba byigenga, uhawe ibyangombwa by’ingendo nka passport akaba yemerewe kujya mu bihugu byose usibye icyo yahunze, Nikobisanzwe we ibyo ntabyo azi! Nta mugayo ariko kandi ni nayoyayo kuko si umudiplomate ahubwo ni umwicanyi!Aratinyuka agaterura ati:
“Mozambique icumbikiye Abanyarwanda benshi, tukaba dushimira Mozambique n’abaturage bayo kuba barahaye abanyarwanda uburyo bwo gukora business ngo biteze imbere banateze imbere imiryango yabo n’ibindi n’ibndi… Abanyarwanda biyandikishije nk’impunzi muri Mozambique, nka ambasade ntitubavangura, bose turabafasha mu kintu cyose bashaka cyibahuza n’u Rwanda, ntitubafata nk’impunzi!”
Abantu bahawe ubuhungiro n’igihugu, banditswe mu muryango w’abibumbye nk’impunzi kandi barindiwe umutekano n’igihugu kandi bakarengerwa n’amategeko mpuzampahanga arengera impunzi… Nikobisanzwe ati twe ntitubata nk’impunzi!!!
Andi makuri Ijisho ry’Abaryankuna rigikorera itohoza ni avuga ko Mozambique ishobora kuba yarabonye akaboko ka Kagame mu gufasha ibyihebe bimaze iminsi bigaba ibitero mu majyaruguru ya Mozambique mu ntara ya Cabo Delgado! Ayo makuru avuga ko ubutasi bwa Leta zunze ubumwe za Amerika bwatahuye isano ry’ibyo byihebe n’ibya ADF bikorera muri Ituli ho muri DR Congo bikarwanya ubutegetsi bwa Uganda kandi bikaba biterwa inkunga na Paul Kagame. Ayo makuru Amerika imaze kuyashyikiriza Mozambique, Perezida w’icyo gihugu yagiye kuyabaza mu Rwanda.
Icyatangaje urwo ruzinduko rwe rwabanje kugirwa ibanga n’ubutegetsi bwa Kagame kugeza ubwo byaje kubaraburana ubwo Televiziyo ya Mozambique yabitangazaga nyuma y’aho umukuru w’icyo gihugu Filipe Nyusi ahindukiriye!
Mwibaze namwe umukuru w’igihugu agasura ikindi gihugu mu rugendo rw’akazi… ntibishyirwe no kuri tweeter nibura ya Village Urugwiro!Habe n’inyoni yagize icyo ivuga…
Mu kinyabupfura, no muri diplomasi nyinshi, Perezida wa Mozambique asubiye mu gihugu cye yatangarije itangazamakuru ko ikibazo cyo kurwanya iterabwoba kiri mubyari byamuhagurukije! (Byumvikane neza ko ikihebe gikuru cyamaza kugaragara)
Iki kibazo cyo gufasha ibyihebe kije kiyongera ku bwicanyi n’ikibazo cyo guteza umutekano mucye ibihugu bya SADEC byagizwemo uruhare n’abicanyi ba Kagame ku isonga Claude Nikobisanzwe ndetse n’umwunganizi we Didier Rutembesa bose birukanywe na Leta ya Afurika y’Epfo ariko bakaza gutekera umutwe Leta ya Mozambique ngo barashaka kuhafungura ambasade, bikarangira ba bicanyi aribo bahagaruye! Afurika y’Epfo imaze kubona ibyo, yarumiwe isobanurira umuturanyi wayo wa ruguru nawe akaba adatinze kwibonera ibyo yabwiwe! Gusa igihugu cya Mozambique cyatangaje ku mugaragaro ko ntabufasha bwa gisirikare kifuza ku Rwanda. Hagati aho abaturage b’iki gihugu bakomeje kugaragaza kutishimira ingabo izo arizo zose zaza mu gihugu cyabo ngo zije kurwanya ibyihebe.
Uku kwiyorobeka kwa Nikobisanzwe agira ngo niko bizahora akaba akora ibishoboka byose ngo yigaragaze nk’intama kandi ari isega iryana ari ikirura-muntu, bishobora kuba bizamutemana agacyura umunyu!
Mu rwego rwo gukubitira ikinyoma ahukubuye, Ijisho ry’Abaryankuna n’Abaryankuna Tv, biri gutegura icyegeranyo kihariye kizasohoka mu rurimi rw’igiportugal kugira ngo n’abaturage ba Mozambique bamenye ukuri kuri icyo kirura kigira intama, batazagwa mu ruzi barwita ikiziba!
Manzi Uwayo Fabrice
Maputo Mozambique.