Yanditswe na Cyubahiro Amani
Amakuru agera ku ijisho ry’Abaryankuna nuko abanduye Covid-19 boherezwa iwabo mu rugo kuharwarira, nta miti babahaye ahubwo bakazategekwa kuzagaruka ubwa kabiri kwa muganga.
Ubwo ministiri w’ ubuzima Dr Ngamije Daniel , yasabaga Abanyarwanda kubahiriza amabwiriza n’inama bagirwa n’ inzego z’ubuzima kuko covid-19 ari indwara mbi , yica kandi mu buryo bubabaza, yagize ati: “covid ni indwara yica, yangiza imyanya yo mu mubiri umuntu agapfa yananiwe guhumeka kubera ko ituma amaraso asa n’ avura. Mu miti dutanga harimo ituma amaraso agenda neza kuko iyo amaze kuvura gutyo, bituma akazi kayo ko gutwara umwuka no gusohora indi myuka ivuye mu mubiri kaba katagikozwe. Umuntu rero apfa ababaye kuberako ntabwo umubiri we uba ukibona umwuka ahumeka ngo ugere mungingo zose.”
Ejo ku itariki ya 12 Mutarama 2021 Minisante yatangaje ko umubare w’abamaze guhitanwa na covid-19 mu Rwanda ari 125 mu gihe abanduye biyongereyeho 166 bakaba 9950. Muri abo harimo abakize cyangwa bagapfa kuko umubare w’abakiyirwaye ubwo bari 2 851.
Ibi rero bikaba biteye impungenge ko umubare w’abandura ushobora kwiyongera. Kuko abari kugaragaraho ibimenyetso bya corona virus ntacyo bari gufashwa, mu gihe u
Rwanda rwakira ama miliyoni y’amadolari yo gufasha Abanyarwanda , ahubwo ba rusahurira munduru akaba aribo bigwizaho ayo mafaranga, none abari kwandura nta miti bari guhabwa ahubwo bagategekwa gutaha ngo bazagaruke kabiri.
Mu gihe ingamba zitirirwa kurwanya Covid-19 zikomeje ubwazo kwangiza ubuzima bw’Abanyarwanda aho ugira amahirwe yasubiye ku isuka, kuko nayo hari abayibuze, biratangaje ko ntacyateganyijwe cyo gushyira ahiherereye abanduye Covid-19 k’uburyo batayanduza abandi, ahubwo bakabasaba gusubira mu rugo iwabo. Ese FPR yaba koko yifuza gukumira Covid-19 ?
Cyubahiro Amani