Yateguwe n’Ubwanditsi

IMPAMVU 100-ABARYANKUNA BATANGA, BASANGA ARI NGOMBWA KO FPR-INKOTANYI IVANWA KU BUTEGETSI VUBA NA BWANGU.

1.UKO UMUGAMBI MWIZA WA BENSHI WAHINDUWE N’UMUNTU UMWE UMUYOBORO W’AMARASO.

UMWINJIZO/ISASIRA #IMPAMVU100

Mbere y’uko twinjira birambuye muri gahunda yacu y’”IMPAMVU 100”, izagaragaza amakosa yose FPR yakoreye u Rwanda n’Abanyarwanda kuva yashingwa kugeza uyu munsi, tunagaragaza impamvu igomba guseswa vuba na bwangu, reka tubanze dusobanukirwe neza n’icyo FPR ari cyo maze tuzinjire mu zindi ngingo abantu twese twumva neza FPR tuvuga iyo ari yo.

INTANGIRIRO

Nta shyano nko kubyara umwana witeze ko azakugirira akamaro, ahubwo akakubera ikirumbo, akirirwa aguhondagurira imbere y’abaturanyi, yewe bwacya akakwirenza.

Nta shyano nko kubaka inzu ikaguhitana,

Nta shyano nko kugura imidoka ikakwirenza!

AMATEKA YA FPR-INKOTANYI Amavu n’amavuko yayo.

Reka twibutse abayamenye tunabwire abatarayamenye incamake y’amateka ya FPR-Inkotanyi.

Nyuma y’uko bamwe mu banyarwanda bahunze igihugu mu myaka ya za 1959, maze bo n’abababakomokaho bakagerageza kugaruka mu gihugu bifashije intwaro mu myaka ya za 60 mu bitero byamenyekanye nk’ibitero by’INYENZI (Ingangurarugo ziyemeje kuba Ingenzi) ariko ibyo bitero bikaburizwamo n’izari ingabo z’u Rwanda zitewe inkunga n’ababirigi, hari abaketse ko ikibazo cy’impunzi z’abanyarwanda  kirangiriye aho. Nyamara aho abo banyarwanda bari bari mu mahanga atandukanye, ikifuzo cyari kimwe: Gutaha mu rwababyaye mu buryo ubwo ari bwo bwose, cyane ko abaturage b’ibihugu bari barahungiyemo bakunze kubagwa nabi banabibutsa ko ari abimukira b’impunzi ko bagomba gusubira mu gihugu cyabo. Mbese wabigereranya n’uko biri ubu. Ahagana muri 80 abari baragabye ibitero muri za 60 bari bamaze gusaza. Ariko ababakomokaho bari bamaze kubyiruka. Yemwe n’abahunze ari impinja, ikifuzo cyabo kwari ugutaha mu Rwanda, mugihe abavukiye mu mahanga bari bafite amatsiko menshi yo kumenya igihugu cyabo cy’amavuko ababyeyi na bakuru babo bahoraga babwira ko u Rwanda ari igihugu gitemba amata n’ubuki! Nibwo rero hashinzwe ishyirahamwe RANU (Rwanda Alliance for the National Unity) maze nyuma mu mwaka wa 1987 havukamo Front Patriotique Rwandais FPR Inkotanyi.

Abari ku isonga ry’ishingwa rya FPR hasigaye mbarwa. Abandi nk’uko tuza kubibona, inyuma ya FPR hari hihishe inyamaswa, umubisha murimbuzi, wari urangamiye gusa kwicara ku ngoma maze abanza kurimburana ubukana abo bari batangiranye uwo mushinga wo gucyura abanyarwanda, akurikizaho kwica abanyarwanda atanzitse maze agera n’ubwo afata ubutegetsi amaraso amaze kumeneka muri Genocide. Ndetse na nyuma yo gufata ubutegetsi iyo nyamaswa iracyica abanyarwanda ibamenera amaraso ku manywa y’ihangu.

Kuba FPR yarabuze abayishinze bikozwe n’umuntu umwe wigaragije agatsiko gato kamufasha muri ubwo bugizi bwa nabi, bagasiribanga icyari imigambi myiza kigahindurwamo uruganda rucurirwamo amahano asimbura ayandi ku munyarwanda n’u Rwanda binyuze mu bikorwa  byinshi by’ubugome iyicarubozo n’ibindi bisa n’ubukunguzi, icyo ni kimwe mubyo Abaryankuna bashingiraho bavuga ko FPR-Inkotanyi igomba kuvanwa ku butegetsi ikanaseswa kuko kugeza ubu byamaze kugaragara ko “nta FPR nta Kagame”!

2. ISHYAKA RIRANGWA N’IBYO RIHARANIRA: FPR IBYO YAHAGURUTSE IHARANIRA UBU NTA NAKIMWE WAYIBAZA BYOSE BYABURIJWEMO.

Igihe FPR INKOTANYI yashingwaga yari yihaye intego 8 ari zo:

1. Kugarura Ubumwe bw’Abanyarwanda;

2. Kubumbatira ubusugire bw’Igihugu n’umutekano w’abantu n’ibintu; 

3. Kubaka ubuyobozi bushingiye kuri demokarasi; 

4. Kubaka ubukungu bushingiye ku mutungo bwite w’Igihugu; 

5. Guca umuco wa ruswa, gutonesha, imicungire mibi y’umutungo w’Igihugu n’izindi ngeso zijyanye na byo; 

6. Kuzamura imibereho myiza y’Abaturage; 

7. Guca burundu impamvu zose zitera ubuhunzi no gucyura impunzi; 

8. Guharanira umubano hagati y’u Rwanda n’ibindi bihugu ushingiye ku bwubahane, ubufatanye n’ubuhahirane.

Reka tuvuze ku ntego imwe imwe mu ncamake, kuri izi 8 FPR yatangiranye, nubwo tuzabigaragaza neza ingingo ku ngingo muri iyi gahunda y’impamvu 100.

1. Kugarura Ubumwe bw’Abanyarwanda:

Iyo FPR icura cyangwa se itekinika imibare nkuko ikunda kubyita ikanayitangaza, yifashihsije abamotsi bayo Fidel  Ndayisaba na John Rucyahana n’abandi, ivuga ko ngo ko yagaruye ubumwe bw’Abanyarwanda, yewe ntinagire isoni zo kubeshya ko ubumwe n’ubwiyunge mu banyarwanda bugeze hejuru ya 98%. Ariko kuko FPR itakibaho, abayisigayemo buri wese yivugira ibyo yishakiye bityo hakabaho ivuguruzanya. Umva uko muri Mata 2018 Senateri Dr Emmanuel Havugimana yatangarije abari mu biganiro byo kwibuka ko mu Rwanda 17% harimo n’abana bavutse nyuma ya jenoside bifuza ko yakongera ikabaho!

Usibye ibi Dr Havugimana avuga ko byavuye mu bushakashatsi, mu Rwanda nta bwiyunge buhari kuko FPR itigeze imenya inzira yo kunga Abanyarwanda cyangwa se ikaba yarayiteye umugongo ibishaka.

Kugira ngo abantu biyunge, habanza gusasa inzobe abantu bakabwizanya ukuri (ibyo ntibyabayeho). Hagakurikiraho gusaba imbabazi kubo bigaragaye ko bafite amakosa ku mpande zombie (ibyo ntibyabayeho). Byaba ngombwa ko hari abacibwa ikiru bakagicibwa (ibyo ntibyabayeho). Hagakurikiraho gutanga imbabazi (Ibyo ntibyabayeho, nibyabayeho byabaye bikozwe ku bantu kugiti cyabo nabo bake cyane kandi Leta nabwo ikabyivangamo ivuga iti, ubwo umubabariye reka noneho amategeko nayo akore ibyayo)! Ubundi hagakurikiraho kunga abari bafitanye amakimbirane abantu bagasubira kubana neza.

2. Kubambatira ubusugire bw’igihugu n’umutekano w’abantu n’ibintu:

Kugeza ubu agatsiko kigaruriye FPR niko gahungabanya ubusugire bw’ibindi bihugu. Kugeza ubu ibihugu nka Congo, u Burundi, Uganda, Afurika y’Epfo n’ibindi byareze u Rwanda ko rwavogereye ubusugire bw’ibihugu byabo. Abasirikare b’u Rwanda n’abaturage muri rusange ntibajya bagoheka bahora bikanga ibitero byaturuka hanze kubera ubushotoranyi bukorwa n’u Rwanda rwa Kagame na FPR ye.

Ku bijyanye n’umutekano w’abantu n’ibintu byo ni agahomamunwa! Agatsiko ka FPR kica abenegihugu, kakabashimuta, kakabafungira ubusa, kugeza naho gasanga abanyarwanda kure iyo bigwa aho bagahungiye. Uko ako gatsiko gahungabanya umutekano w’abantu n’ibintu byabo ntikabirebera izuba.

Abantu bambuwe imitungo yabo, ibikorwa bya benshi byagushijwe mu bihombo abandi banyerwa nta mpamvu, nta ngurane naho zitanzwe zikaba ntaho zihuriye n’agaciro k’umutungo wasenywe!

3. Kubaka ubuyobozi bushingiye kuri demokarasi.

Demokarasi bivuga ko abenegihugu bishyiriraho ubuyobozi binyuze mu matora, hakanajyaho amategeko n’inzego babigizemo uruhare akaba ari nabo bikorera.

Kuva FPR Inkotanyi yagera ku butegetsi, abaturage ntibigeze bagira amahirwe yo kwihitiramo abayobozi. Iyo batoye  batora ku ngufu, hagashyirwaho abayobozi FPR yihitiyemo. Ugerageje kwiyamamaza ashakirwa ibyaha agafungwa, ni muri urwe rwego Theoneste Niyitegeka wagerageje kwiyamamariza umwanya wa Perezida wa Repubulika yahimbiwe ibyaha agakatirwa imyaka 15, Diane Rwigara nawe ahimbirwa ibyaha amara umwaka muri gereza afungurwa amatora yararangiye, Madame Victoire Ingabire bigenda gutyo, Bernard Ntaganda, Deo Mushayidi n’abandi benshi bagerageje kurwanira demokarasi utarabashije kwicwa nka André Rwisereka, yarafunzwe cg arahunga.

Muri Demokarasi abaturage nibo bashyiraho abayobozi, mu Rwanda rwa FPR niyo ishyiraho abayobozi.

Muri Demokarasi Abayobozi bakorera abaturage. Mu Rwanda rwa FPR abaturage bakorera abayobozi!

Muri Demokarasi abayobozi batinya abaturage. Mu Rwanda rwa FPR abaturage batinya abayobozi.

Iki kibazo cya demokarasi tuzakigarukaho mu mpamvu 100 zindi ziri imbere.

4. Kubaka ubukungu bushingiye ku mutungo bwite w’Igihugu.

Leta ya FPR ntiyashoboye gushyira mu bikorwa iyi ntego nziza yari yihaye, kuko ubukungu bw’igihugu bufitwe n’agatsiko gatoya gafitanye karangajwe imbere na Perezida Kagame. Ibyari ibigo bya leta byubatswe mbere y’uko FPR igera ku butegetsi byaragurishijwe maze bihabwa abo muri ako gatsiko. Gushora imari utazwi mu gatsiko bisa nk’ibidashoboka iyo utemeye ko FPR iyigarurira.  Abaturage bahatiwe guhinga ibyo bahatiwe ubundi abenshi bakarandurirwa imyaka.

Aho kugira ngo ubukungu bwite bw’igihugu aribwo bugena imimere n’imibereho y’igihugu, Kagame yahisemo kwisumbukuruza yanga ko igihugu kibaho mu bushobozi bwacyo ibyo bituma agishora mu madeni y’umurengera  amafranga atagira icyo amarira igihugu, ahubwo anyerezwa na Kagame n’agatsiko ke gusa ku buryo asigaye ari ku rutonde rw’abantu bakize muri Africa. Ntiyagarukiye aho kuko byagaragaye ko yanahisemo ingeso yo kuba igisambo cy’ingufu aho ateza umutekano muke mu gihugu gituranyi cya Congo agamije kubona uko asahura umutungo w’icyo gihugu, bityo ubukungu bugarazwa mu Rwanda bukaba budashingiye ku mutungo bwite warwo.

5. Guca umuco wa ruswa, gutonesha, imicungire mibi y’umutungo w’igihugu n’izindi ngeso zijyanye na byo:

Aha ho FPR yakoze ibinyuranye n’ibyo yari yarihaye, ruswa n’ikenewabo, nibyo bintu FPR yimakaje.

Buri mwaka, umugenzuzi mukuru w’imari ya Leta agaragaza ibimiriyari byanyerejwe n’abayobozi bakuru ba FPR ariko nta gihinduka, ikenewabo cyashyizwe imbere ku buryo usanga imirimo myinshi y’ingenzi mu gihugu yari igaruriwe n’abantu bake bakomoka mu miryango imwe!

Kubijyanye n’imicungire mibi y’umutungo, Kagame ari mubawusesagura ntacyo yikanga.Nk’urugero ingendo ahoramo zidafite impamvu  akoresheje indege ze ebyili ahindukira akanazikodesha na Leta bitwara akayabo k’amafaranga y’igihugu ariko nta na rimwe  inteko ishingamategeko yigeze ibibaza!

6. Kuzamura imibereho myiza y’abaturage:

Iyi ntego ikubiyemo ubuvuzi n’ubuzima, uburezi ndetse n’imibereho myiza isanzwe, imirire, indwara n’ibindi…

Ibijyanye n’uburezi bwasubiye inyuma ku buryo ireme ry’uburezi ryapfuye aho umwana arangiza amashuri abanza atazi gusoma, bwaki igwingira n’imirire mibi kubana bari munsi y’imyaka 5 ndetse n’abagore biri ku kigera cyo hejuru, ubuvuzi bumungwa no kwiba imfashanyo ndetse n’amafranga agenewe uru rwego, amafranga agenewe gahunda z’ibyorezo nka Sida n’ibindi arigisirizwa mu bigo agatsiko kashyizeho byo kugafasha muri ubwo bujura. Muri ibyo twavuga nk’Imbuto foundation, umuryango wa Mukagame Jeanette Kagame.

Ahantu henshi nta mazi meza ahari, aho ari arahenze kadi ni makeya ku buryo atagera kuri bose, hakiyongeraho imibare mihimbano no gushinyagurira abaturage.

7. Guca burundu impamvu zose zitera ubuhunzi.

FPR aho guca ubuhunzi ahubwo yaje ije kubwongera. Hafi ibihugu byose byo ku isi bicumbikiye impunzi z’abanyarwanda.

Abanyarwanda bari barahunze kera bagahutse 1994 abenshi bahise bisubirirayo, Abacyuwe ku ngufu bava Zaire na Tanzania 1996 bamwe barongeye bafata inzira barahunga.

Ubu hari impamvu igihumbi zatuma umuntu ahunga: umutekano mukeya, gushimuta, kwica inzara n’imibereho mibi muri rusange. Ibintu byafashe indi ntera kugeza ubwo FPR ihitamo gufungirana abaturage mu gihugu kugira ngo bose badashirira hanze, maze ifunga imipaka iruhuza na Uganda ndetse n’u Burundi.

Inkambi zahozemo abanyarwanda muri Uganda zarongeye zakira abandi batagira ingano bahunze FPR-Inkotanyi. Aho gukemura ikibazo cy’impunzi ahubwo agtsiko kigaruriye FPR kohereza  ingabo kuzicira iyo zahungiye; urugero ni muri Congo muri iki gihe.

Muri Make abanyarwanda FPR yatumye bahunga igihugu cyabo baruta kure abo yatumye bahunga, abo yishe baruta kure abo ivuga ko yakijije!

8. Umubano n’amahanga:

U Rwanda n’icyo gihugu ku isi kibanye nabi n’ibihugu byinshi, yaba mu karere ruherereyemo ndetse na kure ku isi.

ingero ni nyinshi, ubu rwafunze umupaka na Uganda, ruhora rushotora U Burundi ku buryo nta migenderanire myiza ihari, rubanye nabi na Tanzania kugeza aho perezida Kagame yivugiye ko ashobora kwica uwari umukuru wa Tanzania bwana Kikwete.

u Rwanda na Congo nta wa handagaza ngo avuge ko bibanye neza, ukurikije uko abaturage b’icyo gihugu binubira kuba baturanye n’u Rwanda, kugeza ubwo bamwe muri bo bifuza ko rwakwiye guterwa rukigarurirwa. Umubano w’ubuhendanyi hagati ya Kagame Na Tsisekedi ntawavuga ko ari umubano ushobora kurama.

Mugihe FPR yavugaga ko izimakaza umubano mpuzamahanga ushingiye ku bwuhane n’ubwuzuzanye, yarabicuritse ahaubwi ishingira politiki yayo ku gasuzuguro no ku bushotoranyi kuburyo u Rwanda rwagiye ruhabwa gasopo n’ibihugu  kubera gushaka kuvogera ubusugire bwaho no guhohotera impunzi, twavuga Australia, Ubwongereza, America, Suwede, Ububiligi, Canada Afurika y’Epfo n’ibindi.

Kubera amarorerwa akorwa n’agatsiko kari ku butegetsi mu Rwanda, hari abanyarwanda baba bafite isoni zo kugaragaza ko ari abanyarwanda igihe bari hanze yarwo.

3. FPR YA KAGAME NTA BISUBIZO BY’U RWANDA IFITE.

Nkuko bizwi na buri wese, ibibazo by’u Rwanda bishingiye ku nzigo n’umwiryane mu banyarwanda n’ibishingiye ku miyoborere mibi bimaze igihe kirekire mu Rwanda. Ibi byiyongereyeho ubukoroni n’ibindi bibazo byatewe no kugerageza gushaka igisubizo ariko bigakorwa nabi, aho kubona igisubizo, ahubwo bikongerera ububasha ikibazo nyiri izina. Uko ni ko ikiswe impinduramatwara ya 1959 yaje aho gucyemura ikibazo ahubwo icyongerera ubukana, binamera bityo muri 1973 ubwo Habyarimana yahirikaga ubutegetsi bwa Kayibanda.

Ntibyagarukiye aho rero kuko muri izo nkundura zose Abanyarwanda bakomeje guhemukirana bikaviramo benshi kwicwa, abandi bagahunga igihugu cyabo. Muri ubwo buhunzi, ni ho havumbutse umugambi wo gushinga FPR, ngo abari barahunze batahe mu Rwanda, nyamara ibi nabyo kimwe n’ibyabibanjirije twakomojeho hejuru, byarangiye byongereye ikibazo aho kugicyemura.

4. KAGAME YARIMBUYE ABASHINZE FPR ARAYIGARURIRA.

Zimwe mu mpunzi zafashe umugambi wo gushinga FPR ngo zirwane zitaha mu gihugu, zisanze mu mutego mutindi wa Kagame n’agatsiko yikikije, maze ibintu biradogera, nubwo koko ubutegetsi bwo babugezeho, ariko ibyaginjwe n’iyo nkundura ntibigira ingano kugeza no kuri jenoside n’ubundi bwicanyi ndengakamere bwibasiye Abanyarwanda bukozwe n’abandi banyarwanda.

Nkuko tubicyesha inkuru y’isesengura yasohotse ku Ijisho ry’Abaryankuna kuwa 20 Nyakanga 2019, ifite umutwe ugira uti: “IGERERANYA HAGATI YA KAGAME NA SATANI: BAHURIYE KUKI?BATANIYE KUKI ?”

Umusesenguzi yagaragaje ingingo zigera kuri 6 Kagame na Shitani bahuriyeho, ariko kandi anagaragaza uko ugendeye ku bikorwa byabaranze, hari aho ugera ukabona Kagame arusha Shitani ubugome. Kubera ko turi kuvuga kuri FPR ya Kagame yaje guhinduka igikoresho cya Kagame, uwashaka yanavuga ko iyo FPR ya Kagame hari aho irusha ubugome Shitani.

Umusesenguzi yaragize ati:

Satani yageze mu isi ahaciriwe yirukanywe mu ijuru. Ubwo yamanukaga, Bibiliya igaragaza ko yamanukanye n’abamarayika bari bamuyobotse bangana na ¼ (Yesaya 14:12-15). Kuva icyo gihe kugeza ubu, ntiturumva ko Satani hari umumarayika mubo bamanukanye yishe, yafunze cyangwa wamuhunze! Mugihe Kagame we yaje mu Rwanda avuye muri Uganda aho yari yarahungiye, azana na bagenzi be barwana ndetse baza no gufata igihugu. Amaze gufata ubutegetsi yadukiriye bagenzi be, bamwe arica, abandi arafunga, abandi barahunga n’abasigaye yabatesheje agaciro, ntibifitiye icyizere kandi nta n’umuturage ukibafitiye!

Kugira ngo ibi byumvikane neza, reka tubagezeho urutonde rw’abagize uruhare mu gushinga FPR, abayirwaniye n’abakomeje kuyikorera nyuma yo gufata ubutegetsi ariko FPR ya Kagame ikaba yarabahinzemo ubudehe ikabica, ikabafunga, abanda ikabamenesha hirya no hino ari na ko icunaguza abanda.

• Kagame yishe abashinze FPR ari bo: Aloysia Inyuma, Col Patrick Karegeya, Ambassador Jacques Bihozagara, na Patrick Mpazimaka.

• Kagame yishe abakoreye FPR bayigeza ku butegetsi muri abo twavuga nka :Maj Gen Fred Gisa Rwigema, Seth Sendashonga, Alex Ruzindana, Theoneste Lizinde, Richard Isoke, Augustin Cyiza,…

• Kagame yazengereje kandi amenesha abayishinze n’abagejeje FPR ku butegetsi ari bo: General Kayumba Nyamwasa, Alexis Kanyarengwe,Gerald Gahima, Jean Marie Micombero,Theogene Rudasingwa …

• Kagame yatesheje agaciro ndetse anirukana mu mirimo abakoreye FPR barimo: Pasteur Bizimungu, Dr Emile Rwamasirabo, Dr Charles Muligande, Patrick Habamenshi, Gen Karenzi Karake, Gen Sam Kaka, Gen Muhire, Gen Nyamvumba, Christine Umutoni…

5. Uko FPR yahindutse umutwe w’iterabwoba

Nk’uko twerekanye ko intego FPR yashinganywe nta n’imwe igikurikiza tukongera tubona uko Kagame yarimbuye bagenzi be akayigarurira wenyine icyari FPR cyahindutse umutwe w’iterabwoba, kuburyo icyari kije guhindura ibintu mu Rwanda ngo ibintu bigende neza ubu cyabaye umutwaro ku  banyarwanda kikabatuza mu bwoba, kikababuza  ubwigenge n’ubwisanzure, ubu Abanyarwanda bakaba barahindutse ibikange kubwa FPR ya Kagame.

Kubera iki?

Kuva intambara yiswe iyo kubohoza u Rwanda yahindura umuvuno mu kwezi kwa Mutarama 1991, Fred Rwigema n’abandi basirakare bakuru bamaze kwicwa FPR nibwo yatangiye ibikorwa by’iterabwoba twashyira mu byiciro bibiri:

• Ubwicanyi ndengakamere: Aho FPR yanyuraga hose yarangwaga n’ibikorwa by’ubwicanyi butagira rutangira. I Byumba, mu cyahoze ari Sous-Prefecture ya Kirambo, mu Mujyi wa Kigali, i Gabiro, Gakurazo, Ishyamba rya Arboretum ya Kaminuza i Butare, Umusozi wa Kibeho, amabagiro ari hirya no hino mu gihugu azwi nka Safe houses, amashyamba anyuranye mu gihugu ndetse n’amashyamba ya Republika Iharanira Demokrasi ya Kongo aho hose habitse amamiliyoni n’amamiliyoni y’abagabo, abagore, abana, abakecuru, abasaza, bisasiwe n’icumu rya FPR-Inkotanyi yashimuswe na Paul Kagame

• Uretse kwica abaturage, FPR yaranzwe no kwica uwo wese yakekaga cyangwa se yabonaga ko afite cyangwa agerageza kugira ibitekerezo bya politiki bitandukanye na gahunda y’agatsiko k’abantu bake cyane bakikije Paul Kagame. Nuko Rwigema, Bunyenyezi na Bayingana bishwe rugikubita, Afande Kayitare Intare batinya, Adam Waswa, ntibashobore kubona igihugu baharaniye. Nuko Assiel Kabera, Patrick Karegeya, Seth Sendashonga, Niyomugabo Nyamihirwa Gerald, Kizito Mihigo bishwe ku mabwiriza y’umuntu umwe ari we Paul Kagame.

Ibyo rero byatumye abantu bose bumvise izina Paul Kagame cyangwa se izina FPR bashya ubwoba, icyari umugambi wo gucyura impunzi z’abanyarwanda no kuzana demokarasi cyahindutse umutwe w’iterabwoba wujuje ibyangombwa.

6. INGARUKA Z’IBI BYOSE

• Kubera ko ubutegetsi bwa FPR ari ubutegetsi bushingiye ku kinyoma no kumena amaraso, ibi byagize ingaruka zikomeye mu gusenya umuryango nyarwanda. Ubu mu Rwanda kutavuga urumwe na FPR bihita bisobanura kwicwa. Ndetse byadukiriye umuryango nyarwanda muri rusange aho iyo abantu batumvikanye bumva ko kwicana ari byo byihutirwa. Mujya mubyumva kenshi mu miryango.
• Kwiba umutungo w’igihugu ari wo mutungo wa rubanda. Birababaje cyane kubona abanyarwanda barushaho gutindahara mu gihe agatsiko kabakandamije karya kakamena. Icyo gitugu kimena amaraso nta kindi kigamije : ni ukwikubira ibyiza by’igihugu byiharirwa n’agatsiko k’abantu bake bafatanyije na ba mpatsibihugu.

• Gukomeza gucukura icyobo cy’inzigo hagati y’abanyarwanda. Kubera ko ubutegetsi bwa FPR bugendera ku kinyoma, butsindagira mubanyarwanda bo kiswe ubwoko bw’abahutu ikimwaro cyo guhora biyumva nk’abacanyi, maze  bukabeshya abo mu kiswe ubwoko bw’abatutsi ko ako gatsiko kabo kaje kubarinda abahutu. Nyamara ukanuye amaso wakwibaza impamvu Rwarakabije na Ninja bicaranye n’ako gatsiko ku ngoma, mu gihe Rwigara na Kizito kabisasiye. Abo ni abazwi

7. UMWANZURO:

• FPR yashimuswe na Kagame ayihindura akarima ke acaba agabira kandi akanyaga uwo ashaka. Si umuryango w’Abanayarwanda ahubwo ni ubukonde bwa Kagame.
• FPR ya Kagame si umucunguzi w’Abanyarwanda ahubwo ni umurimbuzi w’abanyarwanda.
• FPR ya Kagame si ishyaka rya Politiki ahubwo ni umutwe w’iterabwoba.

8. ICYO ABARYANKUNA BATEGANYA GUKORA KURI IKI KIBAZO.

Nkuko Abaryankuna bakomeje kubigaragaza kuva mu ntangiriro, Abaryankuna basanga FPR nk’imwe mu byagize uruhare rukomeye mu kworeka u Rwanda, idashobora kubicyemura cyangwa ngo ibisubize ku murongo dore ko iyo nzira FPR yayibye igihe ishimutwa na Kagame akayihindura iye ku giti cye.

Kubw’iyo mpamvu ikomeye cyane:

• Abaryankuna basanga FPR igomba kuvanwa ku butegetsi hanyuma igaseswa  vuba na bwangu nkuko ibyayibanjirije byasheshwe, hagatangira ibihe bishya byo gusana no kubaka u Rwanda rushya rurangwa n’amatwara mashya.
• Abaryankuna bafatanyije n’abandi bose baba Abanyarwanda n’abanyamahanga bifuza impinduka mu miyoborere y’u Rwanda biyemeje kurwanya FPR no kurimburana n’imizi amatwara yayo yoretse u Rwanda mu buryo bwose bushoboka,.
• Abaryankuna bakomeje gahunda zitandukanye zo gutegura u Rwanda n’amatwara azaruranga bigasimbura amabi yose u Rwanda rwaranzwe na FPR ya Kagame.
• Abaryankuna biteguye gutangariza Abanyarwanda inkuru y’ihumure n’amahoro, ibihe by’amage u Rwanda rwashyizwemo na FPR bigashyirwaho iherezo.
• Abaryankuna barateganya kunamura icumu hahagarikwa ku buryo bwa burundu intambara umunyarwanda arwana n’undi, kunga abanyarwanda binyuze mu buryo mwo kurekuriranira ndetse n’ubwo gukubitwa icyuhagiro. Bityo hacibwa inzigo hagati y’Abanyarwanda.

Iyi nkuru wayisanga ku Abaryankuna TV, mu buryo bw’amajwi n’amashusho.

Ubwanditsi.

• WordPress
• Facebook
• Twitter
• YouTube