Yanditswe na Manzi Uwayo Fabrice
Inkuru dukesha indangururamajwi ya FPR, Igihe.com yo ku wa 03/11/2022, yahawe umutwe ugira uti: «Gen. Kabarebe yahishuye uko Ingabo za RPA zacitse intege zikabona urugamba nk‟ubwiyahuzi», yagaragaje ko Gen. James Kabarebe, umujyanama wa Perezida Kagame mu by’umutekano, yavuze ko mu minsi ya mbere y’urugamba rwo kubohoza igihugu, abenshi mu basirikare bakuru b’Ingabo zahoze ari iza RPA bapfuye bituma bamwe batangira gucika intege no kubona ibyo bari gukora nka misiyo y’ubwiyahuzi.
Ibi yabivugiye mu biganiro yagiranye n’abanyeshuri ba Kaminuza y’u Rwanda ku wa Gatatu, tariki ya 03 Ugushyingo 2022. Ibi biganiro byari byitabiriwe n’ababarirwa mu bihumbi bitanu, aho byari bifite insanganyamatsiko igira iti: «Urubyiruko rurangwa n’umuco w’ubwitange no kutagamburuzwa rwigira ku mateka yo kubohora igihugu cyacu». Gen. Kabarebe yagaragaje ko kubohora u Rwanda cyari kimwe ariko ko kucyubaka cyari ikindi, anahishura ko hari n’ababonaga urugamba nk’igikorwa cy’ubwiyahuzi, kuko uwari uyoboye urugamba, Gen. Maj. Fred Rwigema yishwe rugikubita. Nyuma yo gutakagiza no kuvuga imyato shebuja Kagame, abanyeshuri berekanye ko bacengewe n’isomo- rutwitsi rya Gen. Kabarebe, maze umwe muri abo banyeshuri, abaza ikibazo cyahawe amashyi menshi na bagenzi be, bigaragaza ko buri wese yari anyotewe n’igisubizo iyi nsakazabinyoma yari igiye gutanga.
Uyu munyeshuri wa Kaminuza yabajije Gen Kabarebe ati: «Mu by’ukuri nkunda gukurikirana ibiganiro byawe ndetse n’amateka uvuga ku rugamba rwo kubohora igihugu, ariko iyo nkurikiye neza, nsanga nta hantu ugaragaza neza inshingano zawe zari zihariye muri urwo rugamba, usibye kuba wari umusirikare urwana nk’abandi, turashaka ko nako ukatubwiraho. Murakoze.»
Mu gusubiza iki kibazo, Gen. Kabarebe yuzuye umwuka wera, maze avugisha ukuri kwajyagwa kuvugirwa ahihereye, ariko we agushyira hanze, ndetse agutangariza imbere y’abarimu ba Kaminuza, barimo n’abigisha amateka, ndetse n’urubyiruko rufite ubwenge bwo gutekereza kuko rwiga muri Kaminuza, ariko aranarenga abibwira isi yose. Aho gusubiza gusa ku kijyanye n’inshingano ze zihariye, nk’uko yari azibajijwe, yivugiye ya mateka yari azwi na benshi ariko akaba nta watinyuka kuyavugira mu ruhame: Ubwicanyi FPR yakoze. Yagize ati: « Urebye nyuma y’itariki 1 Ukwakira 1990, mu byumweru bibiri Inkotanyi zinjiye, buri muntu wese yabonaga ko abantu bafashe icyemezo cy’ubwiyahuzi mu gutera u Rwanda. Barabibonaga ko bakoze ubwiyahuzi, kuko abasirikare bose bari batatanye, batagifite icyizere na gito cyo gukomeza urugamba, nta bwinyagamburiro bari basigaranye na buke».
Yakomeje agira ati: «Nyuma y’aho H.E. Kagame aziye yangize umu-officier umuri hafi bya bugufi igihe cyose. H.E. yatanze amabwiriza kuri training ya RDF, kandi Commander in Chief icyo avuze gihinduka itegeko. Yaravuze ngo “ndashaka ko RDF iba trained, ikaba a killing machine, aho iciye ntihagire igisigara”. Iyi ni nayo training twakomeje gutanga n’ubu tugitanga, ku buryo nta mpungenge dufite about the next generations (…)».
Aha harimo ikinyoma kuko Kabarebe yavugaga ngo Kagame yategetse ko RDF iba “trained, ikaba killing machine, aho iciye ntihagire igisigara ”, ariko mu by’ukuri ibi yabitegetse RPA, ingabo za RPF-Inkotanyi. Gusa hari abumvise ibi bahinda umushyitsi bumvise Kabarebe ashinje Kagame, baratangira bati:
«Kamubayeho! Akoze mu jisho ry’intare iraje izikure imikaka iyimushinge, noneho ntarara!»
Ni mu gihe kandi kuko Kabarebe yari avuguruje Dr. Jean Damascène Bizimana, wumvikanye mu bihe bitandukanye, avuga ko “dukwiye guhora ushimira Inkotanyi kuko zizaba uhoraho nk’Imana”, ubundi ati: «Abashimira Inkotanyi n’Imana bajye bashimira Inkotanyi gusa kuko ari zo zarokoye Abatutsi, iyo Mana yabatereranye (…)», none uyu munsi Kabarebe ati: «RDF yatojwe kuba killing machine, ikomeje no kubigaragaza kuko , mu kwezi kumwe, yabohoye Cabo Delgado kandi ikubye u Rwanda inshuro eshatu». Aha rero niho buri wese yari yiteze ikigiye kugurikiraho, kuko Kagame yari ashinjwe ku mugaragaro n’umusirikare yihiteyemo ngo amube hafi, bivuze ko yari avuze ukuri kose atari akwiye kubwira isi yose, ndetse bakabona ko kuba avuyemo shebuja agomba kubimuziza byanze bikunze.
Nyuma y’iminsi 9 gusa, ku itariki ya 12 Ugushyingo 2022, ubwo Perezida Kagame yasozaga ihuriro rya
15 rya Unity Club, yifatiye ku gahanga Guverinoma ya mbere yari iyobowe na Perezida Bizimungu, Minisitiri w’Intebe Twagiramungu, yarimo abaminisitiri nka Seth Sendashonga, Alphonse-Marie Nkubito, Jacques Bihozagara, Joseph Nsengimana, n’abandi, yerekana ko Seth Sendashonga yamwitiye umwicanyi mu ruhame, akagira umujinya ndetse akivumbura, akava mu nama ashaka kwica abamushinjaga bose, ariko ngo ntiyabikora. Imana itaratumye abikora icyo gihe yagira ngo Gen. Kabarebe azamushinje mu 2022, imbere y’isi yose, maze ibyajyaga bivugirwa mu matamatama bijye ku mugaragaro.
Abasesenguzi batandukanye bemeza ko ubwo Kagame yavugaga ko yabajije Seth Sendashonga inshuro eshanu ngo “uratinyutse unyise umwicanyi”, yashakaga kuvuga Gen James Kabarebe, wamushinje kuhindura RPA ikaba Killing machine, akabimushinjira muri Kaminuza yuzuyemo abanyabwenge batandukanye, ndetse akabivugira imbere ya cameras, amahanga yose akabimenya, bivuye ku muntu wari umuri hafi, utatinyuka kumubeshyera. Ikindi kandi ni uko yabivuze azi neza ingaruka ashobora guhura nazo.
Ibyo Kabarebe yashinje Kagame ni ibyumvikana ku muntu wese, n’umwana yabyumva. Kuba Kagame yaragize RPA Killing machine birigaragaza. Killing machine Kabarebe yavugaga ni ukwica igihumeka cyose FPR yasanze mu Rwanda. Kurokora Abatutsi Dr. Bizimana avuga nta shingiro bifite kuko nta byabaye.
Ibyo FPR yavugaga byo guhagarika jenoside nabyo nta byabaye kuko yakomeje koreka imbaga: abitabye inama bitaba Imana, abaguye i Gakurazo, abiciwe mu nkambi y’i Kibeho, abiciwe mu buvumo bwa Nyakiriba, abana b’i Nyange ku Kibuye, abiciwe mu mashyamba ya Congo, ndetse n’abagikomeje kwicwa berekana neza ko ibyo Gen. Kabarebe yavuze ari ukuri: FPR ni Killing machine yishe amamiliyoni y’abantu!
Killing machine niyo yamaze Abanyarwanda bo mu moko yose, niyo kandi yatemaguye inka n’ihene, n’inkoko ntiyazirebera izuba, nk’uko Kagame yabitegetse abari kuri training agira ati: “Mwubake killing machine, itazagira icyo isiga inyuma aho izaca hose”. Uyu munsi Killing machine niyo irimo gutemagura abantu muri Congo bikitirirwa abandi, kugira ngo impamvu yo kugumayo iboneke, abana b’u Rwanda bahashirire.
Umuhanga akaba n’umusesenguzi byahamye, Pasteur Uwizeyimana Schadrack, afata amagambo ya Gen. Kabarebe ndetse nayo Tito Rutaremara yigeze kuvuga ko Inkotanyi zari zaraseseye mu Rwanda hose, ndetse ko no mu bwicanyi, zafatanyaga n’Interahamwe kuri barrières, akayagereranya n’amagambo aboneka muri Bibiliya, mu gitabo cyo Kubara, igice cya 22, icya 23, icya 24 n’icya 25, aho umwami w’i Mowabu, Balaki mwene Sipori yatumagaho umuhanuzi Balamu mwene Bewori w’i Petori ngo aze amuvumire Abayisirayeli, ariko aho kubavuma ahubwo akabaha umugisha. Na FPR byayigora kuvuma abanyamugisha!
Kuba Gen. Kabarebe yaratangarije amahanga yose ko FPR-Inkotanyi na Kagame ari Killing machine, ntabwo byari kumugwa amahoro, ariko byibuze yashyize ibuye ry’insanganyamfuruka (pierre angulaire) ku nzu y’ukuri ikwiye kubakwa n’Abanyarwanda bose nta n’umwe uvuyemo, cyane cyane ko yavuze ko amabwiriza avuye i Bukuru ahinduka itegeko. Uyu munsi ari mu mazi abira, ariko n’ubwo yabizira yateye intambwe nziza, iganisha ku kuri, twasaba ko bagenzi be bamwigana maze bagasohora ukuri kose bazi.
Uyu munsi Gen. Kabarebe afungiye iwe azira gushinja shebuja, ariko byibuze ibikorwa byakorewe mu mwijima Uwiteka yabishyize ahagaragara, ku Karubanda. Amagambo Kagame yavugiye muri Unity Club ayitirira Seth Sendashonga, nta wundi yabwiraga uretse James Kabarebe kuko kuva icyo gihe ntarongera kugaragara mu ruhame. Uku kuyobya uburari kugarira mu kuba Kabarebe yarashinje Kagame, akisobanura mu cyumweru gikurikiyeho, Kabarebe ntiyongere kugaragara ni gihamya ko abicanyi batangiye kwivamo.
Uwavuze ko Kagame ari umwicanyi ntabwo ari Seth Sendashonga ahubwo ni James Kabarebe, kandi ni ibintu byumvikana. Ibyo abicanyi bavugiraga mu bwiru bwabo, ibyo bakoreraga mu mwijima, James Kabarebe yabishyize ahagaragara, atari ku bw’imbaraga ze ahubwo ari ku mbaraga z’Umwuka wera, umwe wakoreye muri Balamu, maze kuvuma Abayisirayeli agatanga umugisha, bikarakaza Balaki.
Kuba bivugwa na Kabarebe wabihagazeho n’amaguru ye, akabyumvisha amatwi ye, akabibonesha amaso ye, akabishyira mu bikorwa, ni igihamya cy’uko urubanza rw’uko FPR ari Killing machine yarangije kurwicira.
Ijambo ry’Imana rigira riti:«Nuko umumarayika ukomeye aterura ibuye rimeze nk’urusyo runini ariroha mu nyanja, aravuga ati: “uko niko Babuloni, wa mudugudu ukomeye, uzatembagazwa mu kanya nk’ako guhumbya, kandi ntuzongera kuboneka ukundi” » (Ibyahishuwe 18:21).
Iri jambo rero rirareba cyane FPR-Inkotanyi kuko nyuma yo kwicira urubanza, itazongera kuboneka ukundi, kandi iteka ryose ku butaka bw’u Rwanda. Ubutegetsi bwa Kigali bujugunywe mu nyanja kandi ntibuzongera kuboneka ukundi. FPR yarangije kwicira urubanza aho yatangarizaga isi yose, ku manywa y’ihangu, buri wese akamenya ko ari Killing machine. Gen. Kabarebe yanze ko bizavugwa uko atabivuze maze ahitamo kujya kubibwira abanyabwenge muri Kaminuza. Ibi nabyo si uguhurirana, ahubwo ni umugambi w’Imana.
Kuri iyi ngingo, umushakashatsi Pasteur Uwizeyimana Schadrack ashishikariza Abanyarwanda gutandukanya ukuri n’ibyemezo by’inkiko. Yagize ati: «Amateka ni ukuri nyakuri kw’ibyabaye, kudahinduka ibihe byose. Amateka ni ukuri k’umucamanza utabera naho ibyemezo by’inkiko ni umwanzuro ufatwa n’abacamanza b’isi, uhindagurika mu gihe ndetse n’ahantu. Kenshi uba wuzuye kubogama no kwibeshya. Uyu mwanzuro uvuga ukuri gusa, iyo ushingiye ku mateka yabaye». Aya magambo y’uyu muhanga rero aratwibutsa amakinamico duhora tubona mu nkiko za Kagame.
Uyu muhanga akomeza agira ati : « Amateka agaragaza ko habayeho jenoside yakorewe Abatutsi, kandi nta wubihakana. Ku rundi ruhande amateka agaragaza ko Abahutu nabo bakorewe jenoside, tutirengagije Abatwa. Amateka agaragaza ko, n’ubwo imibare y’abapfuye itangana, ariko abantu bapfuye ku mpande zose». Yemeza na none ko abashakashatsi bagaragaje uburyo FPR yicaga abantu kandi n’ubu ni ko ibigenza ku bo idashaka bose baba Abahutu, Abatwa cyangwa Abatutsi.
Ku rundi ruhande ubugome bwa FPR bugaragarira mu gutora itegeko rihana ingengabitekerezo ya jenoside. Muri iryo tegeko bashyizemo ko uzahirahira akavuga ko hari Abahutu cyangwa Abatwa bishwe, azaba apfobeje Jenoside yakorewe Abatutsi, ndetse azahanishwa gufungwa imyaka itari munsi y’itanu ariko itarenze irindwi.
Nyamara duhora twumva ibihugu bikomeye nk’Amerika n’Ubwongereza byemeza ko Abahutu nabo bishwe, bakibaza impamvu bahora basubiramo ko jenoside yakorewe Abatutsi gusa, bakayibura, ahubwo bagahitamo kuvuga ko ari jenoside yabereye mu Rwanda (génocide rwandais/rwandan genocide), nyamara ntiturumva Kagame yacanye umubano nabo, abashinja gupfobya jenoside ye, kuko azi icyo abakuraho. Itegeko tumaze kuvuga rero rigamije gucecekesha igice cy’Abanyarwanda, abafite icyo banenga FPR bose!
Mu kwanzura rero twavuga ko kuba Kabarebe yarashinje Kagame, hashira iminsi 9 Kagame akisobanura, ariko akamushyira mu mazi abira, ari ikintu cyo kwishimirwa kuko noneho abicanyi babirazwe na ba Se n’ababigiyemo bashaka amaramuko batangiye gushinjana. Kuvuga ngo Seth Sendashonga yamwise umwicanyi bituma ashaka kumara abo bari kumwe, ni ikimenyetso gikomeye ko Kagame ari we uri inyuma ya Killing machine. Kuba yaragambiriye kubamara, ni nk’aho yabishe, kuko ku Mana, ducumura mu bitekerezo (en pensées), mu magambo (en paroles), mu bikorwa (par action) no mu byo twirengagije gutunganya (par omission). N’ikimenyimenyi abari aho bose yabishe urusorongo, abasigaye nabo ntiyabaretse ku bushake bwe, bamukize kubera ya Mana Dr. Bizimana yasimbuje Inkotanyi.
N’ubwo FPR yafunga Gen. Kabarebe cyangwa ikamwica, ntizakuraho ko ari Killing machine. Abashakashatsi banditse bumwe mu buryo bwinshi FPR yakoresheje yica abantu aho yanyuze hose, na n’ubu ikaba ikibica. Gusa igitangaje ni uko noneho igihe kigeze ngo bamwe mu bakoze ubwo bwicanyi batangire bashinje bagenzi babo. Uku kuvananamo nta kabuza biratanga ukuri, ndetse binafungurire abandi bagutinyaga kukuvuga.
Ntitwasoza rero tudahamagariye Abanyarwanda bose guhagurukira Impinduramatwara Gacanzigo, kuko Uwiteka ubwe yihagurukiye ngo abicanyi ba FPR batangire gushinjanya. Iyi mpinduramatwara niyo yonyine yatuma Abanyarwanda basasa inzobe, bagahana aba bose batangiye kwivamo, abasigaye bakabana amahoro.
FPR, WIGIZE KILLING MACHINE, UMARA ABANTU, GIRA WIGENDERE, NTITUZAGUKUMBURA!
Manzi Uwayo Fabrice