Ni ngombwa ko urubyiruko rw’u Rwanda rwose rwo mu moko yose (n’ibyiswe amoko byose) rwitabira impinduramatwara Gacanzigo.
Mu mateka y’igihugu cyacu urubyiruko rwagiye rukoreshwa mu kubiba inzigo mu Banyarwanda, kuyibagarira no gukora ibikorwa bibi biyishingiyeho.
Dufashe urugero rwahafi , ubutegetsi bwa Perezida Juvenal HABYARIMANA bwakoresheje urubyiruko rwiswe Interahamwe muri jenocide yakorewe Abatutsi muri 1994. Kurundi ruhande niko ingabo za FPR INKOTANYI (RPA/RDF) ziganje urubyiruko zari mu bwicanyi bwibasiye cyane cyane abahutu mu duce dutandukanye tw’igihugu ndetse zaje gukomereza k’umpunzi mu mashyamba ya Congo.
Nta washidikanya ko n’ubu Ubutegetsi bwa FPR mu nkubiri yabwo yo kugoreka amateka bushyira imbere urubyiruko rubarizwa mu “NTORE” binyuze mu mahuriro atandukanye no ku mbuga nkoranyambaga, mu iyoza bwonko mu baturage , mu kwica ndetse no kubuza uburyo cyangwa guhimbira ibyaha ushatse kuvuga ukuri ku bwicanyi bwakozwe kandi bugikorwa n’ubutegetsi bwa FPR inkotanyi.
Abatarya indimi mu mateka ntibatinya kugaragaza ko mu gihe cya Jenoside, Interahamwe zari ziganjemo urubyiruko nkuko n’ubu INTORE za FPR ziganjemo urubyiruko.Biragaragara ko uru rubyiruko rwose ruba rugenda buhumyi ko rurimo gukorera inyungu z’ubutegetsi buba buriho,rukoreka imbaga y’abanyarwanda.
Urubyiruko rwibumbiye muri RANP-Abaryankuna (Urugaga Nyarwanda Ruharanira igihango cy’amahoro mu gihugu) kubw’ umutima wo guhangayikira no gutegura ahazaza heza h’u Rwanda rurahamagarira Abanyarwanda cyane cyane urubyiruko kuza tugafatanya mu nkubiri turimo yo gukuraho ubutegetsi mu gihugu cyacu.
Dukeneye igihugu kizira :
- Ihererekanwa ry’inzigo mu bisekuru by’abanyarwanda (narishe na nariciwe),
- Ubusumbane n’ivangura iryo ariryo ryose,
- Kutubahiriza uberanganzira bwa muntu na Demokarasi isesuye,
- Umurage wo gusimburana mu buhungiro,
- Isimburana ku butegetsi ribi ryoreka imbaga rigahitana ubuzima bw’abatari bake,
- Ubuzima bukeshwa gusingiza abategetsi no kuba imbata zabo.
- Gushora ibyamirenge mu kwimenyekanisha mu mahanga kubera ubwoba bwo guhishira ibibi ubutegetsi bukorera abanyagihugu,
- Hari urubyiruko rwibaza ruti:
Ese impinduramatwara irandeba njye n’umuryango wanjye kandi dukomeye muri FPR?
Yego.
Kuko iyo dusubije amaso inyuma guhera kuri revolution ya 1959 abayoboye u Rwanda n’imiryango yabo mu bwicanyi bwo gusimburana k’ubutegetsi bakomeza gusimburana mu buhungiro mu bihugu by’amahanga.
Ningombwa guca uwo murage mubi, nkazabana n’abagenzi banjye neza tukubaka u Rwanda rushya.
Ni iki cyarandura burundu kwitana ba mwana biri hagati y’Abanyarwanda?
Impinduramatwara Gacanzigo .
Ubuse mbaye umuryankuna sinaba ndi umwanzi w’igihugu?
Oya.
Kuko kuba umwanzi w’igihugu ni ukurebera ibibi bikiberamo(ubwicanyi,ubusahuzi,ivangura,akarengane,kumeneshwa) bituma abanyarwanda bakizinukwa uko bwije n’uko bukeye.
- Hari uwarenze ikigero cy’urubyiruko wibaza ati:
Ese nakwinjira mu Baryankuna kandi ntari urubyiruko?
Yego.
Kuko nta gihugu Kitagira abakuru kandi nta muryango utagira ababyeyi.
Rubyiruko bana b’u Rwanda igihe kirageze ngo tumenye kandi twumveko abanyapolitiki batadukunda ahubwo badukoresha munyungu zabo niduhagurukire hamwe nkabonse rimwe twamagane kandi twitandukanye n’ibikorwa bibi dushorwamo bikomeje kubiba inzigo mu banyarwanda .
“Twese hamwe ntawusigaye, nta kurobanura, nta nzigo cyangwa inzika, nta bujiji cyangwa ubwoba, twamagane ikibi, duharanire icyiza twimure inzigo twimike igihango cy’amahoro!”
BYAMUKAMA Christian
KOMISERI W’UNGIRIJE USHINZWE ITUMANAHO.