Yanditswe na Nema Ange
Ejo ku I tariki ya 21 Gicurasi, ikinyamakuru Financial Afrik, cyarateruye giti: “Umubare w’ubukungu bw’u Rwanda rwa Paul Kagame ugihe kujya hasi ku nshuro ya mbere kuva Jenoside yaba”. Minisitiri w’Ingenamigambi, Dr Uzziel Ndagijimana, yatangaje nyuma ya Covid-19, ubukungu bw’u Rwanda buziyongeraho 2% gusa mu mwaka wa 2020 umuntu agereranyije n’umubare 9,1% wo mu mwaka wa 2019. Kuri we ngo ubukungu buziyongeraho 6,3% muri 2021 bwongere kugera ku 8% mu mwaka wa 2022.
Mubyo yatangaje kandi, dogiteri Ndadijimana yavuze ko ubukerarugendo na za hoteli buzagabanukaho 30% gusa, naho umurimo wo gutwara abantu wo ukaba uzihagararaho ukazagabanyukaho 1,9% gusa. Mu mboni ya Ndagijimana ngo ubuhinzi, inganda, na serivisi byo bizakomeza gutera imbere aho ubuhinzi n’inganda buzazamura ubukungu kuri 4% muri 2020 ( aho byari kuri 17% muri 2019), naho urugero rwa za servisi rwo rukazamuka 1% muri 2020 (aho rwari kuri 8% muri 2019).
Mu rwego rwo kugabanya ingaruka za Covid-19 k’ubukungu bw’igihugu, ngo u Rwanda ruratenganya kongera ingengo y’imari y’igihugu k’urugero rwa 7,5% mu mu mwaka w’ingengo y’imari wa 2020/21. Ayo mafaranga akazava ku batera nkunga, k’ubukungu no mu myeenda bazafata ikazishyurwa mu myaka iri imbere!
Nubwo twakomeje kubagezaho imyeenda y’umurengera u Rwanda rwakomeje gufata Covid-19 igitangira, ubutegetsi bwa FPR burateganya kongera kuguza mu mahanga miliyari 783.4 y’amanyarwanda, ni ukuvuga amafaranga arenga gato miliyoni 800 z’amadolari!
Mbere yo kugaruka k’umubare w’ubukerarugendo watangajwe, turabamenyesha ko u Rwanda nyuma yo kugurisha RwandAir ku kigo Qatar Airways, rugiye kongera gushyira amafaranga y’Abanyarwanda agera kuri miliyari 145 Frw muri RwandAir! Kuva ikigo Rwandair cyashyirwaho, buri mwaka gihomba amafaranga agera kuri miliyoni 50 z’amadorali.
Mu kugaruka k’umubare w’ubukerarugendo, urugero rwa 30% ruteye kwibaza ibibazo. Mu mwaka wa 2018, Clare Akamanzi umuyobozi wa RDB, igihe yashakaga kwemeza amahanga ko gushyira amafaranga y’abaturage muri Arsenal ari igikorwa kiza, yatangaje ko u Rwanda rusurwa n’abakerarugendo Miliyoni imwe n’ibihumbi magana arindwi (1 700 000), uyu mubare unaboneka mu mibare ya Leta ya FPR yahaye Banki y’isi.
Tugendeye kuri uyu mubare, umuntu yavuga ko u Rwanda ruzasurwa n’abantu Miliyoni imwe n’ibihumbi ijana na mirongo icyenda (1 190 000) mu mwaka wa 2020 nyuma ya Covi-19! Igihe mu bihugu byose ingamba zo kurwanya Covid-19 zikiriho, cyane cyane izo gutembera, mu gihe impuguke mu ngendo zo mu kirere ziteganya ko mu muri uyu mwaka wa 2020, ingendo zo mu kirere zizagabanuka ku kigero kiri hagati ya 45 na 57%, umuntu ntiyabura kwibaza aho abantu barenze miliyoni bazanyura bajya mu Rwanda. Umuntu abinyujije mu nyurabwenge, yabona ko umwe mu mibare u Rwanda rwatangaje ari ikinyoma cyambaye ubusa.
- Bishoboka ko abantu 1 700 000 batigeze basura u Rwanda mu mwaka wa 2018!
- Bishoboka ko u Rwanda rurimo rurateganya nabi ingaruka za Covid-19 ku mibare y’ubukerarugendo!
- Iyo mibare uko ari ibiri ishobora kuba irimo ibikabyo. Icyakora niba u Rwanda ruzasurwa n’abantu barenze Miliyoni, kuki ubuyobozi bwihutiye gushyira amafaranga y’akayabo muri Rwandair
Mu gusoza iyi nkuru, turabamenyesha ko mu bindi bihugu bitunzwe n’ubukerarugendo, imibare birimo birashyira hanze ntaho ihuriye n’iy’u Rwanda. Bulgaria, Cambodia, Costa Rica, Croatia byatangaje imibare iri hagati ya 45% na 75%.
Nema Ange