Yanditswe na Mutimukeye Constance
Ejobundi ku tariki ya 21 kamena 2022, ikinyamakuru Infochrétien.com cyatangaje ko ISIS yibasiye ibiturage bituwemo n’Abakristu mu ntara ya Cabo Delgado muri Mozambike. Ibyo bitero byabaye hagati y’i tariki ya 23 niya 31 Gicurasi 2022, bihitana abantu 8.
Ku i tariki ya 15 Kamena 2022, Guverinoma y’Ubufaransa yabujije abaturage bayo kujya mu ntara ya Cabo Delgado. Itangazo rya minisiteri y’ububanyi n’amahanga y’Ubufaransa rigira riti : “Nyuma y’ibitero bikomeye byabaye mu mwaka wa 2021, cyane cyane mu mijyi ya Mocimboa da Praia nuwa Palma, umutekano mu ntara wasubiye inyuma cyane. Abantu bahunze uturere tugwabwaho ibitero baracyari impunzi mu ntara. Tugendeye ku bitero byagabwe mu turere twa Ancuabe na Mecufi, tuributsa tunashishikariza abantu kutajya mu karere ka Cabo Delgado, harimo n’umujyi wa Pemba. Ako karere kari mu ibara ry’umutuku ku bigendanye n’umutekano. Abantu byaba bishoboka ko bajyayo basabwe kwimenyekanisha kuri ambassade y’ubufaransa i Maputo bakiyandikisha”.
Iyi nkuru yuko umutekano mu karere ka Cabo Delgado wasubiye inyuma yacecetswe n’itangazamakuru nyuma yaho ryali ryarashyuhsye ritangaza uburyo RDF yatsinze.
Nkuko abakurikira ibibera muri ako karere bagiye babitangaza ku mbuga nkoranyambaga : « Ibitero cyera byibandaga mu ntara ya Cabo Delgado (Mocimbia De Praia, Mueda, Nangade, Macomia, Palma) kuri ubu birimo biragera no ma Majyepfo y’igihugu ndetse no mu ntara ya Nampula.»
ISIS ikaba yaratangaje ku i tariki ya 15 Kamena 2022ko yagabye igitero mu giturage cyegereye umurwa mukuru wa Cabo Delgado, Pemba, mu bilometero 12 gusa yaho. Uwo mutwe ukoresha iterabwoba ukaba warasahuye, ugatwika amazu ndetse n’imodoka z’abaturage.
Casus Belli yanzura ivuga ko u Rwanda, Botswana na Afurica yepfo nizindi ngabo bananiwe gukora ibikorwa bifatika byatsinda ISIS muri Cabo Delgabo. Itumanaho ryabo ntirigenda neza kandi k’uruhande rwabo hapfuye abantu batari bacye. Mozambike yaba yifuza kwegera Portugal ngo yoherezeyo ingabo.
Nanone umuyobozi wa Total Energies, Patrick Pouyanné yatangaje ko « abakozi be batazasubukura ibikorwa muri Mozambique mu gihe hatazaba hatangajwe kandi hemejwe ko umutekano wagarutse mu karere », inkuru dukesha ikinyamakuru Afrique La Libre. Total Energies yari ifite ikizere ko ibikorwa byazasubukurwa mu mwaka wa 2023, ikizere kirimo kirasubira inyuma nyuma yaho ibitero bya ISIS bikomeje kwiyongera mu karere. Umusirikare w’i Burayi, akaba yarabwiye icyo ikinyamakuru ko « NTIBARABIGERAHO », avuga ibikorwa by’ingabo 4100 z’abanyamahanga zoherejwe muri Mozambike.
Abasesenguzi bakeka ko Zimbabwe ariyo ishobora kungukira muri uko kunanirwa kw’ingabo za SADC niza Nyusi na Kagame, kuko ikomeje kuvuga ko bo bazi akarere kandi ko bafite n’ingabo ariko ko badashobora kugira icyo bakora kubera ibihano bashyiriweho n’amahanga. Emmanuel Macron w’ubufaransa akaba yaratangaje ko azakira mugenzi we wo muri Zimbabwe mu ngoro ya Elysée muri uyu mwaka wa 2022.
Constance Mutimukeye