Yanditswe na RUBIBI Jean Luc
Kuri uyu wa mbere tariki ya 11 Gicurasi 2020 Urukiko rw’ibanze rwa Kacyiru rwasomye urubanza rwa Niyonsenga Dieudonne (Cyuma Hassan) akaba nyiri Televiziyo ikorera kuri Murandasi “ISHEMA TV” kimwe n’umushoferi we, Komezusenge Fidele, bakatiwe gufungwa iminsi 30 y’agateganyo mbere y’uko urubanza rwabo ruzaba mu mizi, bityo bakaba bagomba gutegerereza muri gereza ya Mageragere!
Niyonsenga n’umushoferi we batawe muri yombi n’igipolisi ku wa Gatatu tariki ya 15 Mata 2020 bashinjwa kurenga ku mabwiriza ya guma mu rugo yari yashyizweho mu rwego rwo guhangana n’icyorezo cya COVID-19 zari zirimbanije. Niyonsenga Dieudonné umenyerewe ku izina rya Cyuma Hassan, yagiye ku kazi nyuma y’aho Minisitiri w’Ubutegetsi bw’Igihugu, Prof Shyaka Anastase aganiririye n’Ikigo cy’Itangazamakuru cy’u Rwanda(RBA) aho yavuze ko abanyamakuru bo bazakomeza gukora bafasha Leta mu gukomeza gushishikariza abaturage kwirinda iki cyorezo ariko bidakuraho ko na bo bagombaga kubahiriza amabwiriza yo kwirinda COVID-19.
Icyaje gutangaza abantu ni ukubona ubwo uyu munyamakuru n’umushoferi we bashyikirizwaga urukiko, barahinduriwe ibirego. Ibyo kurenga ku mabwiriza ya Guma mu rugo ntaho bigaragara! Bisobanuye ko uyu musore bari basanzwe bamurwaye kubera ukuri yanyuzaga kuri Televiziyo ye “Ishema TV”, bakaba barashakaga urwitwazo gusa! Kugeza ubu Cyuma Hassana n’umushoferi we bararegwa ibyaha bitatu aribyo: kwiyitirira urwego rw’umurimo badakora, gushyamirana n’inzego z’umutekano ndetse n’ icyaha cyo gukoresha inyandiko mpimbano. Ibi byaha bibahamye bahanishwa igifungo kiri hagati y’imyaka itanu n’irindwi!
Ubutegetsi bwa Kagame bumaze gukataza mu guhonyora uburenganzira bwa muntu bukoresheje inzego bwishyiriyeho zidakorera abaturage kandi zitubaha ikiswe itegeko iyo kiva kikagera. Nk’ubu kuri uyu wa mbere mu isomwa ry’uru rubanza, gufata amajwi n’amashusho byari bibujijwe, n’abanyamakuru bari bagerageje gufotora ingoro y’Urukiko ubwayo, abapolisi babategetse kubisiba. Mutekereze namwe, ubwo burenganzira abapolisi babukura he? Abanyamakuru bafite gaciro ki imbere y’abapolisi n’abasirikare ba Kagame!
Si ibyo gusa, ubutegetsi bwa Kagame bwigaruriye urwego rw’Abanyamakuru rugenzurwa (ariko barwise ko rwigenzura) maze bigiye guhumira ku mirarira baruha Barore Cléophas ngo aruyobore! Uru rwego aho gufasha abanyamakuru rufasha Leta kubacura bufuni na buhoro. Cyuma Hassan kugeza ubu araregwa kutagira ikarita y’itangazamakuru yatanzwe n’urwego ngo rubifitiye ububasha, RMC (Rwanda Media Commission). Amakuru Ijisho ry’Abaryankuna rifite ni uko Niyonsenga Dieudonné ari we Cyuma, yishyuye amafaranga yo kongeresha igihe ikarita ye y’itangazamakuru kuwa 13 Mata 2020. Ntibyabujije ariko Barore n’urwego ahagarariye kumwigarika!
Ku mabwiriza y’inzego za kirimbuzi za FPR uru rwego rwa RMC rwariyadukije maze kuwa 13 Mata 2020, rutangaza ko abanyamakuru bakorera kuri Youtube nta burenganzira bafite bwo kujya mu baturage ngo babake amakuru kandi bayatangaze nk’abanyamakuru! Ibi ni agahomamunwa, kuko bisa n’aho RMC itazi aho itangirira n’aho igarukira! Muri iryo tangazo yihakanye abanyamakuru bose bari bamaze gutabwa muri yombi ahubwo ibashumuriza abaturage ngo bajye babanza bake ikarita umunyamakuru wese uje kubaka amakuru!
Uko bigaragara, inzego zose z’igihugu n’abazikoramo bateye umugongo abaturage biyemeza gukurikiza amabwiriza ahonyora abaturage. Iki ni igihe umuturage agomba guhaguruka akarwanira uburenganzira bwe. Ngo utagira Nyirasenge arisenga! Nta gipolisi, nta gisirikare, nta bucamanza none nta n’itangazamakuru ryemewe mu Rwanda! Ijisho ry’Abaryankuna n’Abaryankuna TV tuzaguma iruhande rw’umuturage kugeza igihe u Rwanda ruzatangarizwa ituze ikibi kimaze koherwa aricyo FPR-Kagame n’ibye byose.
RUBIBI Jean Luc
Umujyi wa Kigali