Yanditswe na Nema Ange
Amb Claver Gatete aherutse kuganira n’itangazamakuru ababwira ko “RwandAir, yabaye isubitse gahunda yo kugura indege nshya kubera ko n’izo ifite zitari gukoreshwa neza muri iki gihe cy’icyorezo cya Covid-19 cyasubitse ingendo zo mu kirere hirya no hino ku Isi.” Nkuko tubikeshya ikinyamakuru Igihe.com.
Amb Claver Gatete, minisitiri w’Ibikorwaremezo, yanatangaje kandi ko u Rwanda ruzategereza kugera “igihe abagenzi bazaba bashobora gukomeza gukora ingendo zo mu kirere batekanye, kugira ngo twagure ibikorwa. Ntidushobora kwagura muri ibi bihe”. Kandi ko kuri aya magingo n’indege RwandAir ifite zitabyazwa umusaruro.
Turabibutsa ko nkuko twabibagejejeho mu kwezi kwa Gicurasi 2020 ishyirahamwe mpuzamahanga ryo gutwara abantu n’ibintu mu kirere ryatangaje ko ingendo zo mu kirere zizasubira k’urwego zariho mbere ya Covid-19 mu mwaka w’ibihumbi 2023. Ibyo bishobora kuba bivuze ko RwandAir izongera kugura indege muri 2023.
Ibi kandi bitangajwe mu gihe imishyikirano hagati ya Qatar Airways na Rwandair kugirango Qatar Airways igure 49% y’imigabane muri RwandAir ikomeje. Aho bukera Qatar Airways ishobora kuzagura iyo migabane ku mafaranga ari hafi ya zeru.
Nubwo bizwi ko buri mwaka Leta y’u Rwanda yongera amafaranga mu kigo RwandAir mu rwego rwo kukirinda guhomba burundu, igitangaje nuko uyu mwaka hitwajwe ingaruka za Coronavirus mu gutangaza ko Guverinoma y’u Rwanda igiye kongera ayo mafaranga : “[Guverinoma] yongereye amafaranga yashyiraga muri iyi sosiyete, agera kuri miliyari 145,1 Frw mu mwaka w’ingengo y’imari 2020/2021 avuye kuri miliyari 121,8 Frw mu mwaka w’ingengo y’imari ushize.”
Nguko uko FPR ikomeje gupfusha amafaranga aturuka mu misoro y’abaturage ubusa nk’uko inzobere m’ubukungu David Himbara idahwema kuburira Kagame ko gutunga ikigo cy’indege bitari mu bushobozi bw’u Rwanda. Mu mwaka wa 2018, agendeye ku mibare, yerekanye uko RwandAir ihombya u Rwanda.
- Umutungo wose wa RwandAir muri 2016 wari Miliyoni 238 z’amadolari y’abanyamerica.
- Igihombo cya RwandAir hagati ya 2013 na 2016 : Miliyoni 222 z’amadolari y’abanyamerica.
- Inkunga yatanzwe na guverinoma hagati ya 2013 na 2016 : Miliyoni 192 z’amadolari y’abanyamerica.
- Inguzanyo zose Leta yahaye RwandAir : Miliyoni 238 z’amadolari y’abanyamerica.
- Inguzanyo zose zitaturutse kuri Leta – Miliyoni 100,6 z’amadolari y’abanyamerica.
Iyo mibare yerekanaga uko imikoreshereze y’imari ya RwandAir kuva 2013 kugeza 2016 igaragaza ko buri mwaka RwndAir ihomba.
Nkuko bisanzwe Kagame, aho kumva inama za bwana Himbara yavuniye ibiti mu matwi none kugera muri 2020 aracyavomera mu rutete. Uwanze kumva ntiyanze no kubona.
Ayo mafaranga yose yashoboraga kuba yakoreshwa mu burezi, mu mibereho myiza y’abaturage cyangwa no kwimura mu buryo bwiza abaturage bose basenyewe ubu abana barara mu muhanda.
Nema Ange